Әңгімелесу «Біздің кішкентай құпияларымыз»

«Ж. Қизатов атындағы жоғары ауылшаруашылығы колледжі» КМҚК Халықаралық қыздар күніне арналған кездесуде қыз балалардың құқықтары, жыныстық белгі бойынша кемсітушілік және өзге де маңызды тақырыптар талқыланды. Кездесудің мақсаты – қыздар арасында ашық әңгіме құрып, толғандырған сұрақтарға жауап беру және пайдалы кеңестермен бөлісу.

Қыздарға арналған бұл кездесу өте қызықты әрі танымдық сипатта өтті. Кездесуді колледждің әлеуметтік педагогы С.Г. Коновалова өткізді. Түрлі тақырыптар қозғалды: қыз бала гигиенасы, физиологиялық ерекшеліктер, аурулардың алдын алу, жігіттермен қарым-қатынас мәдениеті.

Әлеуметтік педагог колледж ішіндегі және жалпы қыздар арасындағы өзара қарым-қатынас мәдениетіне ерекше назар аударды.

Кездесу барысында қыздар өздерін толғандырған сұрақтарын қойып, ашық пікір алмасты. Ең үлкен қызығушылық тудырған сәт – соңында өткізілген психологиялық тренингтер болды.

Іс-шара көп эмоция сыйлап, қыздардың көңілінен шықты. Аздап ұялғандарына қарамастан, олар өздерін еркін әрі қуанышты сезінді. Мұндай кездесулер өсіп келе жатқан ұрпақ үшін өте қажет екені сөзсіз.